Главная  »  Страница учителей родных языков

Страница учителей родных языков

 

 

Анфиса Гьашумова (Мухтарова) Дагъустан Республикадин Мегьа-рамдхуьруьн райондин ЦIийи-хуьр хуьруьн А.Исмаилован тIварунихъ галай юкьван мектебдин муаллим я. Вичин пешедал гзаф рикI алай и лезги таватдиз хас къилихрикай сад адан дидед чIалал рикI алаз хьун, лезги зарияр ва абурун эсерар аялриз мукьувай чирун я. И рекьяй мектебда кьиле физвай мярекатрихъ пай кутазвай Анфисади муаллимринни кIелзавайбурун патай чIехи гьуьрмет къазанмишнава.


И мукьвара мектебда кьиле фейи поэзиядин няни лезги зари Седакъет Керимовадин уьмуьрдин рекьиз ва яратмишунриз талукьарнавай. Няни тухудалди ада и темадай ачух тарс ганай. Ана иштирак авур муаллимри ва методистри лагьайвал, тарс вини дережадинди хьана. Гуьгъуьнлай вичи тарс гузвай аялрихъ галаз санал гзаф марагълу сценарий туькIуьрна, заридин шииррин, манийрин, гьакIни видео материалрин бинедаллаз арадал гъайи нянидал жегьил муаллимдин мадни са алакьун винел акъатна. Ада пешекарвилелди тухвай мярекат рикIел аламукьдайди хьана. Муаллимдин ва аялрин лезгидалди фасагьатлудаказ рахунри, заридин шиирар хуралай лугьуни вири гьейранарна.
Кьве сятдин вахтунда кьиле фейи няни иштирак авур вирибурун рикIяй хьана. Эхирдай мектебдин директор Наби Набиева и шад мярекат арадал гъайи Анфиса Гьашумовадиз ва адаз и карда мукьувай куьмек гайи аялриз педколлективдин патай разивал къалурна.


Нянидин видео ютубда эцигнава ва адаз гзаф инсанри килигзава.
«Самур» газетдин редакциядиз ракъурнавай чарче Анфисади икI кхьенва: «Зи дидени буба Ахцегь райондин Мацар хуьряй я. Исятда Мегьарамдхуьруьн райондин Буткъазмаяр хуьре яшамиш жезвай абурухъ чпин магазин ава, хуьруьнбуру зарафатдалди лугьуда хьи, анай къуьрен крчарни галаз жагъуриз жеда. Зи гъуьлуьн хизанда вири музыкантар я. Апай Айдемир тIвар-ван авай музыкадин муаллим я. Ада Шуьрбет Рзакъулиевахъ галаз санал музыкадин техникумда кIелна. Гьавиляй вичин хцел дустунин хатурдай Шуьрбет тIвар эцигнава. Чи Шуьрбетани кларнетдал ягъизва, адахъ «Ситория» тIвар ганвай группани ава. Апаян са стхади зуьрнедални далдамдал, муькуь стхади далдамдал ягъизва. Захъни Шуьрбетахъ Наргиз ва Фазил лугьудай кьве аял ава. Мектебда зарафатдалди вирида заз «Седакъет Керимова» лугьуз эверзава. Вучиз лагьайтIа за вирибур и заридин шиирринни манийрин суьгьуьрда тунва. Иллаки адан «Лезгинкадал илига» мани мектебдани, кIвалени вирида лугьузва».
Чна лезги чIалални поэзиядал гзаф рикI алай Анфисадиз чIехи агалкьунар тIалабзава.

персональныеданные.дети

Новое